CAPÌTULU 1 – parti 5
Su 4 de Abrili de su 1984. Ariseru a noti in su tzìnema. Totus filmis de gherra. Unu bellu meda fueddàt de una navi prena de arrefugiaus bombardada in calincunu logu in su Mediterràneu. Su pùbblicu fiat spassiendi-sì meda po is sparus a un’òmini grassu mannu mannu chi fut circhendi de si fui annadendi de unu elicòteru chi megàt de ddu ponni infatu, innantis ddu biiast corcau in s’àcua che unu porcu de mari, agoa ddu biiast in su mirinu de s’elicòteru, luegus infatu fut prenu de stampus e su mari totu a ingìriu suu fut bessiu a colori de arrosa e nci fut afundau, e totu a una borta coment’e chi s’àcua fiat intrada me is stampus, is spetadoris tzerriànt e arriiant candu nci fut afundau. Insaras si fut bida una barca de sarvamentu prena de pipius cun d-unu elicòteru furriotendi-ddi asuba.
Ddoi fut una fèmina manna, incapas un’ebrea, sètzia in sa prua cun d-unu pipieddu a pala de unus tres annus. Su pipiu fut schillitendi po sa timoria e cuendi sa conca in su petus de issa circhendi de si-nci stichiri pròpriu aìnturu de issa, sa fèmina fut imprassendi-ddu e cunsolendi-ddu mancai issa puru fessit sanguìngia po sa sprama, totu su tempus fut abarrada coberrendi-ddu totu su chi faiat pensendi incapas ca is bratzus ndi-dd’iant a ai scabbùlliu de is ballas. Insaras s’elicòteru nc’iat ghetau una bomba de 20 chilus, unu lampu chi iat fatu tremi paris e sa barca fut fata in centumilla e un’arrogu. Agoa una màgini stravanada de su bratzu de unu pipiu pesendi in artu, in artu, in artu, sèmpiri prus in artu, in s’ària un’elicòteru cun d-una videocàmera in su bruncu ddu depiat ai sighiu finas a susu e iant tzacau meda is manus in sa parti anca ddoi fiant cadiras de su partidu, ma una fèmina chi faiat parti a is proletàrius, totu a una borta iat incarrerau a fai burdellu tzerriendi ca no ddu depiant, ca no ddu podiant fai biri a is piciocheddus, ca no teniant su deretu de ddu fai biri a is piciocheddus, finas a candu no est arribbada sa politzia e no nci-dd’at bogada, no creu chi ddi siat sutzèdiu cosa, a nemus ndi-ddi importat de su chi nant is proletàrius e de is reatzionis chi acostumant a tenni is proletàrius, issus no…
Winston si fut firmau de scriri, in parti ca fut sunfrendi po sa manu cancarada. No sciiat it’est chi ndi-ddi iat fatu stupai cust’arriu de sciollòrius. Ma sa cosa crosidadosa fut ca in s’interis chi fiat faendi-ddu un’arregordu deunutotu diferenti si fut presentau in sa conca sua, a su puntu chi issu giai giai s’intendiat in gradu de ddu scriri. Fut, imoi si-ndi fut acatau, po mori de cust’àteru incidenti chi issu iat totu a una borta detzìdiu de torrai a domu e incarrerai su diàriu. Fut sutzèdiu cussu mangianu a su Ministèriu, amitendi puru de podi pensai chi una cosa diaici nebidosa fiat diaveras sutzèdia.
