Màgini (cuadru IX) pigada de sa “Sala de su burricu de oru” , in sa Rocca dei Rossi in San Secondo (Parma).
Càstia puru: Su burricu atòbiat a Càrite: 5-8.
Intregau a unu tzeracu po si-ndi incurai, su burricu scedau-Lùciu, ddu stratallant.
Lìburu VII, 20.
Ma in d-unu acuntèssiu aici disdiciau su Distinu m’iat castiau cun d-unu acinnu prus allirgu, no sciu chi mi boliat stugiai po perìgulus benidoris, ma certu sarvendi-mì de morti imoi giai decìdia. Difatis apubu po sorti una lutzinedda noa ludosa fata de s’àcua calada de celu sa dii innantis, inguni cun d-unu brìnchidu mi-nci ghetu totu de suncunas, de modu chi sa frama si studat de su totu e deu a s’acabbu ndi bessu, liberau de su càrrigu e sarvau de morti. Ma cussu piciocu malu e scundiu m’iat furriau contras custa atzioni sua arrorosa puru, ca si fiat postu a nai a totu is pastoris ca femu andau deu, de passei, in mesu de is foghixeddus de is bixinus, ca femu imburchinau e arrutu, ca unu fogu malu mi-nd’iat pigau e, scaringendi un’arrisixeddu, iat aciuntu: “Finas a candu duncas eus a nurdiai debadas custa salamandra?”.
Innoi fait a agatai fintzas su scritu originali e sa versioni in italianu:
Intregau a unu tzeracu, cuadru IX
Aici tanti chi sa mama de su molentàrgiu, fora de sentidu ca su fillu si fiat mortu, dd’iat fichiu in su pertusu unu murcioni allutu.
Lìburu VII, 28.
Aici nendi, iat postu is manus asuta de su bistiri e si-ndi fiat bogada sa fàscia, mi-nd’iat acapiau is peis unu a unu e ddus iat strintus a forti, a manera de no mi lassai possibilidadi peruna de m’amparai; intzandus, aciapada sa stanga chi imperànt po serrai sa genna de sa stadda, no iat acabbau de mi tzacai finans a candu, pèrdia sa fortza, stasia, ndi-ddi fiat arrutu de is manus su fusti po mori de su pesu suu etotu. Agoa, chescendi-sì ca is bratzus si fiant fadiaus aici allestru, fiat curta a su fogu e, pigau unu murcioni allutu, mi-dd’iat stichiu in mesu de is nàdias; intzandus, posta menti a s’ùrtima possibilidadi chi mi fiat abarrada, ndi bogu unu striddicu de merda lìcuida e ndi-dd’imbrutu de su totu sa faci e is ogus. No biendi-nci e po su fragu, a sa fini si-ndi fiat fuia de su dannu miu: deghinou unu burricu, che Meleagru, si fiat mortu po mori de su murcioni de cudda Altea chi fiat sciolloriendi.
Sa mama de su molentàrgiu, fora de sentidu, cuadru X
Sighit: Lùciu passat de unu meri a s’àteru, 11 e 12.
