Càrulu Felici de tirannu dd’at acabbada a tifosu
Su Casteddu torrat in Sèrie A, Bideas.org dd’afestat a sa manera sua: chistionendi-ndi in sardu.
Apustis de tantu patimentu, su Casteddu nci-dd’at fata e, gràtzias pruschetotu a Claudio Ranieri, ariseru in Bari at bintu a su de 94 minutus e ocannu chi benit giogat cun is prus scuadras mannas. Si-dda gosaus comenti si spetat custa festa, ma po prexeri sena de retòrica. Su de intendi chistionai (in italianu) de su pòpulu sardu scéti po su fuba e scéti candu binceus est cosa chi no fait a dd’intendi. Is problemas, spaciada s’allirghia, ant a abarrai is pròpius: giòvunus chi no acabbant de studiai e no traballant, “denatalidadi”, energia, ambienti, sanidadi, impresas de masserìtzia e pastoria (e no scéti) tropu piticas po podi cumpeti cun is produtoris de s’Europa de susu, e aici sighendi. Sa Sèrie A est una birdera manna e su de nc’essi est cosa de importu chi nosi podit agiudai a amanniai s’economia e su benistai de sa genti sarda. Ma, torru a nai, lassaus a banda sa retòrica. Po ndi nai una, su stàdiu nou at a tenni unu 30.000 setzidroxus e at a costai unus 180 millionis: teneus unu stùdiu de fatibilidadi chi nos’amostit ca at a essi unu gastu de profetu po s’economia e ca no iat a essi mellus a aconciai unu pagu su chi teneus e a spendi cuddu muntoni de dinai po afortiai sa digitalisadura de s’Ìsula?
Comentichisiat, fortza Casteddu e fortza sèmpiri, ma aguantendi su ciorbeddu allutu!
