Is passilladas de su Touring Club de Casteddu
de Giuseppe Melis Giordano
Su Touring Club Italiano est un’assòtziu nàsciu s’otu de Sant’Andria de su 1894. Duncas tenit centubintinoi annus de vida. In totu custus annus at agiudau is viagiadoris a connosci s’Itàlia, cun is ghias arrùbias e cussas birdis e costumat a organisai atòbius cun s’idea de si pigai pensamentu po s’ambienti e is cosas chi sa stòria s’at tramandau finas a oi.
Impari cun àterus duus amigus cònsolis de Casteddu, Antonello Cicatiello e Franco Sardi, seus impinniaus a fai connosci sa Sardìnnia e sa tzitadi cosa nosta. Finas de su 2018 circaus de fai su chi podeus po organisai passilladas chi potzant agiudai is sòtzius e àtera genti interessada a scoberri is cosas de importu de sa tzitadi e de àteras biddas de Sardìnnia.
In is ùrtimus cuàturu annus eus organisau tres passiladas in Casteddu.
Sa primu dd’eus fata in su 2020 aìnturu de s’ortu botànicu, una prenda de s’Universidadi de Casteddu. In cussas diis su diretori, Gianluigi Bacchetta e unu collaboradori cosa sua, s’ant acumpangiau a biri is matas chi benint de totu su mundu e s’ant contau sa stòria finas de candu est nàsciu in su 1864 in sa baddi de Palabanda.
In su 2022 seus andaus a biri Sa Judaria, cussa parti de Casteddu de susu aundi biviant is ebreus a su tempus de sa dominatzioni pisana e aragonesa. Pensai ca, a cussu tempus, fiant giai milli apitzus de una populatzioni de deximilla personis. Est stètia una passillada de importu po totu su grupu e a s’acabbu eus bisitau su museu de sa cultura ebràica, piticu ma prenu de cosas schetas de cussa cultura e innui eus ascurtau contus apitzus is traditzionis de cussa genti.
Un’àtera passillada dd’eus fata in su 2023 bisitendi su museu d’arte siamese donau a sa tzitadi de Stefano Cardu, unu casteddaju chi at viagiau in Àsia lompendi finas a su Siam (oi Tailàndia) in sa segundu metadi de s’Otoxentus. In custus viàgius at colletzionau prus de milli-e-trexentus manifestus de grandu calidadi e de dònnia materiali: pratus, punnialis, spadas, testus, etc. Custu museu est obertu finas de su 1981 e oi est acasagiau aìnturu de sa tzitadedda de is museus, in Casteddu de susu, su prus tzentru mannu museali de Sardìnnia.
Si nc’est calincunu interessau a is fainas chi ordinzaus e tenit prexeri a si fai sòtziu de su Touring Club podit scriri po informatzionis a cagliari@volontaritouring.it
https://www.touringclubstore.com/it/
Sa màgini de crobeca est de Marco Corda
