26 de austu 2017
Chi si praxit su pugilau, no si-ndi podeis scaresci de custa dii. Sa dii de McGregor contras a Mayweather. Ma chini funt, poita custu cumbatimentu est aici de importu?
Conor McGregor, 28 annus, irlandesu, cumbatenti de MMA (mixed martial arts, artis martzialis amesturadas). S’ùnicu chi est stètiu bonu a binci sa cintòrgia (chi bolit nai a essi su campioni) in duas categorias de pesus diferentis: is pesus pinnas e is pesus lèbius; famau po essi, povinsas, unu grandu maistu de trash talking, su “chistionai mali” de s’aversàriu o, nau a sa sarda, po essi unu grandu provocheri. E in dii de oi, essi provocheris, portat unu sciacu mannu de dinai a is chi comporant is deretus po trasmiti s’eventu.
Floyd Mayweather, 40 annus, americanu, bosceri arrimau. S’ùrtimu cumbatimentu suu, in su 2015, at fatu guadangiai, a is cuncordadoris, 500 millionis de dòllarus. Ma poita est aici famau? Castiai is cumbatimentus: 49 is chi at fatu; 49 is chi at bintu; 0 is chi at pèrdiu. Un’òmini sceti, in sa stòria de su pugilau, at fatu comenti a issu: Rocky Marciano. Agoa de duus annus, at a torrai a cumbati pròpiu po podi scudi a McGregor.
Ma comenti nascit custu disafiu? Nascit gràtzias a una pregonta fata de unu giorronalista a McGregor:
«Dd’iast a disafiai a Mayweather?»
«Baddai in d-unu ring po 180 millionis de dòllarus? Ellus!», s’arrespusta de s’irlandesu.
A Mayweather, chi a cantu provocheria e barrosia est postu beni aicetotu, no nci-dd’est calau meda cussu “baddai” e at arriciu su disafiu. E tra interbistas, datas faddias e provocherias, a s’acabu ant cuncordau sa dii e su cachet: nanca at a essi assumancu a cada de 100 millionis de dòllarus prus is sponsors.
E gei est nudda! Custu poita ca, mancai siat unu cumbatimentu de pugilau, po sa primu borta eus a biri unu grandu campioni de corpus de artis diferentis, McGregor, chi at a circai de binci contras a unu bosceri professionista faendi pugilau sceti. E custu, po unu campioni de MMA, bolit nai a si-dd’arriscai.
Ca is chi faint MMA faint, po ddu nai in pagus fueddus, is mellus tènnicas de cumbati de unas cantu artis martzialis e sport de cumbatimentu, pruschetotu ju jitsu brasilianu, pugilau, tae kwon do, muay thay, wing chun, chene perou si firmai a imparai totu is detàllius chi pertocant dònnia arti martziali. E duncas, mancai McGregor siat unu grandi sbertidori, podit agatai dificurtadi manna faendi unu cumbatimentu de pugilau sceti, anca no fait a donai càrcinus e anca ddoi funt arrègulas prus severas. In is cumbatimentus de MMA, chi si faint aìnturu de un’otàgunu, balint casi totu is genias de corpus, scutus a dònnia logu. Me in su pugilau, ddu scieus totus, is corpus funt totus apitzus de cintòrgia, e finsas is guantonis chi s’imperant funt prus mannus de is chi portant is chi faint MMA.
E insandus, possibilidadi de binci tenit McGregor? McGregor est prus giòvunu de 12 annus; e custu, po un’atleta, bolit nai meda.
Ddoi at totu su chi serbit po sperai in d-unu bellu cumbatimentu!
Arregordai-sì, 26 de austu, e agoa nd’eus a torrai a chistionai impari!
