Cosa de no crei, fiat dumìnigu, su 3 de austu in Bacoli, Campania, candu sa scuadra de is òminis at bintu in sa gara de acabbu de is playoff contras de sa Canoa Club de Napoli po 3 a 2 e at aciapau su scudetu. E is fèminas? Ocannu passau su scudetu dd’iant bintu issas e cust’annu funt arribadas de tres bincendi 4 a 3 contras de sa Posillipo.
S’Jchnusa de Casteddu est assòtziu antigu, fundau in su 1891, e sighit a portai giòvunus e matucus a fai sport de mari: canotàgiu benintèndiu, canoa e vela. In is urtimus annus una truma manna de giovùnus si funt acostaus a sa canoa polu e, comenti eus bistu, su chi nd’est bènniu est una maravìllia diaderus.
“Is arresultaus de spantu arribaus su fini de cida passau benint de s’impìnniu e de su traballu sighius de is giòvunus, ma s’Ichnusa no est sceti un’assòtziu sportivu, est una famìllia, una domu fata de personis chi partzint fadiori, bisus, vitorias e tzapuladas.
Is chi tenint sa sorti bella de bivi s’arròlliu de su totu e de crei in is progetus chi manigiaus connoscint sa passioni e sa fortza chi totus ponint in su chi faint.
Seus orgolliosus de is giòvunus nostus po is cupas e is medàllias chi ant portau a domu, ma meda de prus po cantu donniunu s’intendit parti manna de s’assòtziu, ca sceti diaici seus bonus a fraigai cosas bellas e mannas.
Torraus gràtzias a totus”
(de sa pàgina FB de s’Jchnusa).
Càstia puru Jchnusa-is-canotieris-de-casteddu/
