Countdown
de Marco Corda
Sarbadori Mùrgia fiat asuriu. No est chi is àteras cosas no ddi praxiant, perou beniant sèmpiri apustis de su dinai. Sa famìllia, po nai. No si podit nai ca no stimàt is duas fillas chi teniat, Virgìnia e Sofia, chi ddu agiudànt in butega, ma sa genti naràt ca, si issu essit dèpiu scioberai de sarvai s’atividadi cosa sua o sa vida de una de is duas fillas, sa decisioni no iat a essi stètia aici fàcili.
Sa butega sua, sa prus drogheria manna e beni fornia de Casteddu, chi s’agatàt in su Brugu, fiat una matana* po issu. A ndi sunfriri fiant is chi traballànt po issu poita ca ddu depiant sumportai. Sa situatzioni fiat aici mali posta ca nisciunu dipendenti arresistiat prus de ses mesis traballendi ingunis e a s’acabbada si-ndi andànt. In custa manera is clientis si fiant abituaus a biri sèmpiri facis noas intra de is cumissus. S’ùnicu chi pariat arresisti fiat Armando Gallus, su capu cumissu chi traballàt ingunis de 25 annus. A 45 annus biviat ancora con su babbu e sa mama e no teniat amigus. De sèmpiri sumportàt su principali cosa sua e is machioris suus. Craramenti Sarbadori Mùrgia fiat invècias cumbintu de fai cosa bella, donendi a sa genti sa possibilidadi de traballai, in tempus de crisi che su de oi.
Cussu mengianu, che dònnia dii, Mùrgia fiat andendi a butega. «Andu a pei», iat detzìdiu, e fiat calendi allestru in is arrugas chi portant de sa parti arta de bia ‘dei Punici’, aundi biviat, a su bixinau de Stampaxi aundi s’agatàt sa butega cosa sua. Totu in d-una, de apalas de una furriada, ndi fiat stupau unu tziu currendi a bicicreta, e chi Sarbadori no si-ndi fiat tirau de mesu allestru, agiumai ddu imbistiat. Mùrgia fiat giai chistionendi-ddu a fueddus malus, candu iat biu ca ndi-ddi fiat arrutu cosa de buciaca. Fiat circhendi de si-ddu nai, perou su ciclista si fiat giai fuiu apalas de s’ingruxeri cun bia Sant’Ignazio.
Fatus una pariga de passus, innantis de arribbai màchinas, Mùrgia si fiat incruau po arregolli sa cosa arruta a terra. Fiat unu stùgiu po ollieras. Dd’iat obertu. Aìnturu nci fiant una pariga de ollieras de soli. Legiteddas, a parri suu, comuncas si-ddas fiat postas. Mancai fessint matucheddas, una borta postas, pariant lèbias e discantzosas. A s’acabbada iat pentzau ca gei faiat a ddas imperai.
Comenti fiat aderetzendi-si-ddas, iat intèndiu unu sonu. Luegus ananti de ogus fiant cumpartas scritas. Spantau de sa cosa, si-ndi-ddas iat tiradas luegus. «Ita stocada est acuntessendi?», iat pentzau. Pigau de sa curiosidadi si-ddas fiat torradas a ponni e iat castiau mellus. In sa parti arta de is ollieras nci fiant scritas che is de su menù de is computers. Podiat scioberai intre ‘Zoom’, ‘Augmented reality’ e ‘Advanced functions’.
Sena de pentzai iat tocau sa stanghixedda a dereta e iat scioberau sa funtzioni ‘Zoom’. Ita spantu! Fiat che castiai cun d-unu binòcolu. Sighendi a andai concas a sa butega fiat sperimentendi comenti funtzionàt su ‘Zoom’. Arribbau a faci de bia Tigellio, mòviu de sa curiosidadi de scoberri is àteras funtzionis de custas ollieras stravanadas, si fiat torrau a firmai.
Custa borta iat provau a scioberai sa funtzioni ‘Augmented reality’. A primìtziu non fiat sutzèdiu nudda. Girendi sa conca po agatai calincuna cosa de castiai, totu in d-una fiat abarrau spantau. In su tretu de sa Domu de Tigellio, in logu de is arruinalis de sa domu antiga, nci fiat una domu noa, bella meda cun lollas e pilastrus. Totu comenti e chi fessit fata oi. Fiat cosa de no crei! Iat pentzau abarrendi a buca oberta.
Totu cuntentu po sa scoberta fata, iat sighiu a andai a butega, pentzendi ca mancu mortu si-ddas iat a ai torradas is ollieras a su meri. Intrau a sa drogheria fiat andau in deretura a s’ofìciu cosa sua invècias de fai comenti faiat sèmpiri, candu no acudiat a intrai ca depiat nai cosa a is chi traballànt.
De chi fiat intrau in s’ofìciu cosa sua si fiat torrau a ponni is ollieras e iat sighiu a scoberri àteras funtzionis. Fiat andau a sa boxi de menù ‘Advanced functions’ e iat scioberau ‘Through mode’. Mancai no connosciat beni s’ingresu, iat cumprèndiu ca boliat nai ‘Manera Atressu’. Su chi fiat biendi ddu fiat lassendi sena de sulidu. Mancai fessit aìnturu de s’ofìciu podiat biri totus is piciocus a su bangoni, comenti chi is murus no nci fessint. «Sa prus dii bella de sa vida mia. Diaderus!»
No arrennesciat a cumprendi comenti totu custa cosa podiat funtzionai, ma no importàt, su chi fiat de importu fiat s’arresurtau. Cussas ollieras fiant spantosas diaderus, no nci-dd’as iat a essi torradas, mai. Luegus iat cumentzau a pentzai a totu is cosas chi iat a ai pòtziu fai, e comenti iat a ai pòtziu guadangiai meda de prus, controllendi totu sa genti.
Cuntentu che Pasca, fiat giai giai arrimendi is ollieras, candu iat biu s’ùrtima boxi de su menu: ‘Countdown’. «Bai e circa ita ddoi est cuau in custa funtzioni?» Iat cracau sa boxi, perou pariat ca no fessit sutzedendi nudda. A castiai mellus, perou, in d-unu àngulu nci fiat unu numereddu chi torràt agoa. Unu contègiu a s’umbressi. Su nùmeru torràt agoa comenti e chi fessit marchendi is segundus:
90, 89, 88, 87.
Unu pagu delùdiu de sa cosa, ca no pariat de importu, fiat bessendi-nci de s’ofìciu scarescendi-si-ndi de si-ndi bogai is ollieras. In cussu momentu si fiat arregordau de controllai sa birdiera de foras, poita iat nau de nci ponni is cosas de bendi chi fiant arribbadas de pagu.
50, 49, 48, 47.
Fiat andau ananti de sa birdiera castiendi-dda cun pagu cuntentesa. No andàt beni, no andàt beni.
10, 9 8, 7.
Fiat po torrai aìnturu de sa butega po nai cosa a Armando, candu, in s’arruga iat biu unu billetu de 100 èurus.
5, 4, 3.
Luegus si-nci fiat ghetau po arregolli su billetu, sena de pentzai ca sa bisura fiat cunfùndia de sa funtzioni ‘Through mode’ de is ollieras
2, 1, 0.
No iat biu su pullman CTM nùmuru 1 arribbendi. Sarbadori Mùrgia iat intèndiu sceti unu corpu mannu a su petus chi nci-dd’iat scavulau dexi metrus prus ainnantis. In cussu momentu iat cumprèndiu ita boliat nai sa funtzioni ‘Countdown’, e pustis iat acabbau de intendi o de biri calisisiat cosa. Po sèmpiri.
* ossessione
