Apustis “Tia Angiullina”, “Antoni Maria Mulas”, Lioni, su cani de su bandidori sciancau, pigaus de “Po Cantu Biddanoa”, alloddu una poesia pigada de Passus, Ilisso, 2010
De Benvenuto Lobina connosceus pruschetotu s’arromantzu nodiu. Issu at scritu puru unas cantu poesias chi fait a ddas ligi in s’arregorta Passus, a incuru de Anna Serra Lobina, imprentau de Ilisso in su 2010. Funt poesias de arregordu, de spèddiu, a fitianu annugiadas, sèmpiri prenas de sentidu. Cussa chi paraus innoi contat de sa Noti de cena, sa famìllia est sètzia a mesa, is bècius contant cosa de s’antigòriu, totus bufant calincunu tzicheddu de binu, abetendi po andai a Missa de puddus.
Scritu originali in sardu e italianu
Torra a ghetai
de Benvenuto Lobina
(1) (2)
Torra a ghetai: «Bivat!». Custu sceti
oi m’allirgat su coru.
Paschixedda est benia
e manc’ocannu su chi de tant’annus
seu cichendu ‘e badas, manc’ocannu
dd’ap’agatau.
Notis antigas
de Paschixedda, notis
biancas de nii, nieddas de scoriu,
sètzius tot’a ingìriu ‘e su fogu
cun mama chi fatu-fatu
scaringiàt sa fentana po scurtai
is tocus de sa Missa de puddus,
poi prenàt de tassas unu pratu
de ferrusmartau
e passada a bufai:
a babbu chi contàt contus de ‘idda sua,
a Luisicu chi contàt contus de trincera,
a tiu Bori chi bufada e no naràt nudda,
a totu ‘s àturus, e mesu tassa
a mei, su prus piticu.
E candu s’intendiat su tochitu
a luxi ‘e lantioni aberiaus
unu mori in sa nii chenza ‘e tocai
andendu a crèsia.
Ita bella sa crèsia, sa noti,
ita prexu in su coru ch’intendia
ingenugau a peis de s’artari.
(Deu puru seu stau
àngiulu cun is alas de cartoni,
deu puru apu cantau
«Glòria in excelsis Deo»
ananti ‘e su Nascimentu).
Apustis, a una a una,
si-ndi funti studàdasa is candelas,
s’esti sciorta sa nii, e in su ludu,
in su scoriu ‘e stradas no connotas
mi seu pèrdiu.
E de tandu ddu circu e no dd’agatu
mancu aintru ‘e su coru miu etotu
su Bambineddu ‘e cuddu Nascimentu.
(1) Paraus sa poesia a grafia Su Sardu Standard – SSS – cun calincuna licèntzia poètica.
(2) Pigau de: Benvenuto Lobina, Passus, Tutte le poesie, a incuru de Anna Serra Lobina, pgg. 54 – 57, Ilisso Edizioni, Nuoro, 2010.
